İyunun 8-də Kitab Klubunda xalq yazıçısı Çingiz Abdullayevin Azərbaycan dilinə tərcümə olunmuş “Saturnun tövbəsi” kitabının təqdimat mərasimi keçirilib. Əsərin tərcüməçisi Təbəssüm Muxtarova deyib ki, bu, onun Çingiz Abdullayev yaradıcılığından tərcümə etdiyi beşindi kitabdır: “Çingiz Abdullayevin kitablarını tərcümə etmək o qədər də çətin deyil, çünki onun çox asan və başa düşülən dili var. Düzdür, bəzən problemlər meydana çıxır, bu da jarqonlar və oğruların dilindən deyilən ifadələrlə bağlı olur. Ancaq bu problemlərin də öhdəsindən Çingiz Abdullayevin köməkliyi ilə gəlirik”.
Çingiz Abdulalyev bu əsəri İspaniyada yazdığını söyləyib: “Bu əsəri İspaniyada 20 gün ərzində yazıb qurtarmışam. Çox maraqlıdır ki, mənim çoxsaylı kitabım çıxıb, amma bu kitabın rus, gürcü və fransız dilində tərcümələrinin də digər ölkələrdə təqdimatı keçirilib. Bilmirəm bu kitabın sirri nədədir. Bu əsərdə ən vacib fikir odur ki, ər və arvad boşanırsa, ana uşağa ataya nifrət hissi aşılamamalıdır. Ən azı övlad ataya hörmət hissi bəsləməlidir. Hörmət olmayanda isə nəticəsi çox faciəli olur. Bəzən mənə deyirlər ki, sən detektiv yazmırsan, bizi aldadırsan, deyirsən detektivdir, ancaq əslində sosial problemləri işıqlandırırsan. Bəlkə də bu doğrudur. Ola bilsin ki, bu kitab məhz bu xüsusiyyətinə görə maraqlıdır”.
Xalq yazıçısı əsərin tərcümə variantını oxuduğunu və bəyəndiyini də vurğulayıb: “Razı olmasaydım, çapına icazə verməzdim”.

BAKIDA KİTAB BAYRAMI KEÇİRİLMİŞDİR
 

Mayın 26-da M.Maqomayev adına Azərbaycan Dövlət Filarmoniyasının qarşısındakı bağda Bakı Şəhər Mədəniyyət və Turizm İdarəsinin təşkilatçılığı ilə 28 may - Respublika Gününə həsr olunmuş “Kitab bayramı–2010” satış-sərgisi keçirilmişdir.
“Kitabla dünyanı fəth et!” şüarı altında keçirilən bayramda Vətən, ekologiya, tarix, coğrafiya, milli musiqi, mədəni irs, ümumiyyətlə 20 mövzunu əhatə edən 2056 adda 30 minə yaxın kitabdan ibarət sərgi təşkil olunmuşdur.
Tədbirdə Bakı Şəhər Mədəniyyət və Turizm İdarəsinin şəbəkəsinə daxil olan 80-dən çox kitabxana, kitab klubu, M.Seyidzadə adına kitabxana-mağaza, “Əli və Nino” kitab evi, Bakıda fəaliyyət göstərən nəşriyyatlar iştirak etmişlər.
Bakı Şəhər Mədəniyyət və Turizm İdarəsinin (BŞMTİ) rəisi Əlikram Əliyev 1918-ci il mayın 28-də müsəlman Şərqində ilk demokratik respublikanın ölkəmizdə yaradıldığını bildirmiş, cəmi 23 ay yaşamış bu dövlətin iqtisadiyyat, təhsil, mədəniyyət, səhiyyə və digər sahələrdə gördüyü böyük işlərdən söz açmışdır.
Natiq gənclərin və uşaqların elmə, mütaliəyə marağının artırılması məqsədi ilə mayın 1-dən regionlarda keçiriləcək kitab bayramlarının və bu gün Bakıda keçirilən satış-sərginin böyük əhəmiyyətini vurğulamış, kitabsevərləri təbrik etmişdir.
Mədəniyyət və turizm nazirinin müavini Sevda Məmmədəliyeva kitabsevərləri təbrik etmiş, bayramın təşkil edilməsində əməyi olan BŞMTİ-yə minnətdarlığını bildirmişdir.
Kitab bayramında Bakı şəhər musiqi məktəbləri və mədəniyyət evlərinin kollektivləri, Bakı Uşaq Teatrı, “Cəngi”, “Aysel” və “Şəms” rəqs qrupları çıxış etmişlər.
 

Görkəmli rəssam Elçin Muxtar Elxanın “Rəssam və kompüter”
kitabının təqdimatı keçirildi

 

Mayın 7-də Kitab Klubunun Sərgi Salonunda Elçin Muxtar Elxanın “Rəssam və kompüter” adlı albom-kitabının təqdimatı keçirilib.

Görkəmli rəssamın əməyinin nəticəsi olaraq ərsəyə gələn bu kitabda yerləşdirilən şəkillər insanı düşündürür və onu müəlliflə birlikdə rənglər aləminə səyahət etməyə sövq edir.
Təqdimatda görkəmli rəssamın məsləkdaşları, Azərbaycan incəsənətində ozünəməxsus yeri olan sənətkarlar iştirak ediblər. Tədbiri Kitab Klubunun direktoru Elxan Rzayev açıb və rəhbərlik etdiyi qurumun Azərbaycanda nəşr olunan kitabların təbliği ilə yanaşı mədəniyyət və incəsənətimizin tanınmış simaları ilə vaxtaşırı belə görüşlər keçirərək onların əsərlərinin cəmiyyətin diqqətinə çatdırılmasında da yaxından iştirak etdiyini söyləyib. Daha sonra “Oğuz Eli” qəzetinin redaktoru Azər Abdulla, rəssam Rasim Nəzirov, sənətşünaslardan Sevil Bədəlova və Rəhman Bədəlov çıxış edərək görkəmli rəssamın kompüter qrafikası sahəsindəki yaradıcılığına bir daha nəzər salıb, oxucu diqqətinə çatdırılan bu albomun E.M. Elxanın çalışmalarının bəhrəsi olduğunu vurğulayıblar. Sonda rəssam əl işləri və kompüter qrafikası ilə işlədiyi əsərləri nümayiş etdirərək tədbir iştirakçılarını bir anlıq da olsa özü ilə birlikdə rənglər aləminə səyahət etməyə sövq edib.
Qeyd edək ki, Elçin Muxtar Elxan (Aslanov) Sankt-Peterburq Rəssamlıq Akademiyasını bitirib. Təsvir sənətinin kitab qrafikası, rəngkarlıq və səhnə tərtibatı sahələrində işləyib. Böyük uğurlara imza atan E.M. Elxan “Respublikanın əməkdar rəssamı”, Prezident təqaüdçüsüdür.
Tədbirin sonunda müəllif gələn qonaqlara öz təşəkkürünü bildirib, onlara “Rəssam və Kompüter” kitabından bağışladı.
 

---

"Kitab Klubu"nda "Tapmacalar", "Hansı peşəni seçim?" və "Su pərisi və balıqçı" kitablarının təqdimat mərasimi keçirilmişdir

 

Aprelin 14-də kitab klubunun sərgi salonunda Gülzar İbrahimovanın “Tapmacalar”, “Hansı peşəni seçim”, “Su pərisi və balıqçı” kitablarının təqdimatı olmuşdur.
Kitab klubunun direktoru Elxan Rzayev, Prezident təqaüdçüsü, şair İlyas Tapdıq, şairlər Oqtay Rza və Qəşəm Nəcəfzadə Gülzar İbrahimovanın yeni kitablarından, onların balaca oxuculara müsbət təsirindən danışmışlar.
Bildirilmişdir ki, bundan əvvəl G.İbrahimovanın uşaqlar üçün “Tülkü balası”, “Göydə neçə ulduz var?”, “Mən daha böyüyəm”, “Sehrli təbib”, bütövlükdə 40-dan çox kitabı nəşr edilmişdir.
Tədbirdə Bülbül adına orta ixtisas musiqi məktəbinin 4-cü sinif şagirdləri G.İbrahimovanın şeirlərindən parçalar oxumuşlar.
Sonda müəllif tədbirin təşkilatçılarına və iştirakçılarına minnətdarlığını bildirmiş, yaradıcılıq planlarından danışmışdır. O, hazırda “1001 nağıl” kitabını hər cildi 100 səhifədən az olmamaqla 10 cilddə çapa hazırladığını bildirmişdir.

---

"Kitab Klubu"nda "Bakı Dövlət Universitetinin nəşriyyatçılıq fəaliyyəti" kitabının təqdimat mərasimi keçirilmişdir

Aprelin 7-də Kitab klubunda tarix elmləri doktoru Bayram Allahverdiyevin “UniPrint” nəşriyyatında çapdan çıxmış “Bakı Dövlət Universitetinin nəşriyyatçılıq fəaliyyəti” kitabının təqdimatı keçirilmişdir.
Kitab klubunun direktoru Elxan Rzayev, yazıçı-publisist Knyaz Aslan kitabda Bakı Dövlət Universiteti (BDU) nəşriyyatının yaranması, formalaşması və inkişafından bəhs edildiyini diqqətə çatdırmışlar. Bildirilmişdir ki, ilk dəfə olaraq bu nəşrdə çap proseslərində universitet rektorlarının, nəşriyyat direktorlarının rolu, baş redaktorların, redaksiya müdirlərinin, bədii, elmi, texniki redaktorların fəaliyyəti şərh edilmişdir.
BDU-nun professorları Abuzər Xələfov, Qara Namazov, İsmayıl Vəliyev, yazıçı-publisist Flora Xəlilzadə və başqaları vurğulamışlar ki, tarix elmləri doktoru, professor, qabaqcıl təhsil işçisi, Bakı Dövlət Universitetinin kitabxanaçılıq və nəşriyyat işi kafedrasının müdiri Bayram Allahverdiyevin bundan əvvəl nəşr olunmuş “Kitablar haqqında kitab”, “Kitabxanaşünaslıq”, “Müasir mərhələdə kitab ticarətinin təşkili”, “Ümumi kitab tarixi” kitabları ölkəmizdə nəşriyyat işinin yaxşılaşdırılmasına, çapdan çıxmış kitabların yayılması prosesinə və kitab nəşri sahəsində mütəxəssislərin yetişməsinə müsbət təsir göstərmişdir.
Sonda Bayram Allahverdiyev tədbirin təşkilatçılarına və iştirakçılarına minnətdarlığını bildirmiş, gələcək planlarından danışmışdır.

"Kitab Klubu"nda jurnalistlərin mükafatlandırma mərasimi keçirilmişdir

Dekabrın 25-də "Kitab Klubu"nda kitab işinin təbliğində göstərdikləri xidmətə görə jurnalistlərin mükafatlandırma mərasimi keçirilmişdir. Jurnalistlər "Kitab Klubu"nun rəhbərliyi tərəfindən diplom və qiymətli hədiyyələrlə mükafatlandırılmışlar. İl ərzində jurnalistlərin kitab işinin təbliği istiqamətində gördüyü işlər nəzərdən keçirilmiş və 5 jurnalist mükafatlandırılmışdır:

Fərqanə Gülməmmədova (Space TV);

Cəvahir Səlimqızı ("Mərkəz" qəzeti);

Zahir Əmənov ("Cənub xəbərləri" qəzeti)

Natiq Güləhmədoğlu ("Azadlıq" qəzeti)

Kəbutər Haqverdiyeva ("Yeni Azərbaycan" qəzeti)

150 cildlik Dunya Ədəbiyyatı Kitabxanası seriyasında çapdan çıxmış növbəti 6 kitabın təqdimatı oldu

Dekabrın 23-də Xəzər Universitetinin binasında 150 cildlik Dünya Ədəbiyyatı Kitabxanasına daxil olan növbəti 6 kitabın təqdimat mərasimi keçirilmişdir.  Tədbirdə Kitab Klubunun direktoru Elxan Rzayev, "Tutu" nəşriyyatının direktoru Tərlan Qorçu, Bakı Slavyan Universitetinin prorektoru Asif Hacılı və "Şərq-Qərb" mətbəəsinin nümayəndəsi Rövşən Ağayev çıxış etmişlər. Natiqlər Yunus Əmrənin "Seçilmiş əsərləri"nin, Puşkinin "Seçilmiş əsərləri"nin, Lev Tolstoyun "Seçilmiş əsərləri"nin I cildinin, Daniel Defonun "Robinzon Kruzo" əsərinin, İngilis ədəbiyyatı antologiyasının və Nazim Hikmətin "Seçilmiş əsərləri"nin dilimizə tərcümə olunaraq yeni qrafika ilə çap edilməsinin əhəmiyyətini vurğulamışlar.

Kitab Klubunda yeni təqdimat - "Hər zaman və heç vaxt"

Oktyabrın 31-də Kitab Klubunda gənc şair Səxavət Sahilin "Hər zaman və heç vaxt" adlı şeirlər kitabına təqdimat keçirildi. Təqdimatda yazıçı Səlim Babullaoğlu aparıcılıq etdi. İlk söz Kitab Klubunun direktoru Elxan Rzayevə verildi. O, kitabı oxuyub bəyəndiyini bildirdi və bu janrın (şeirin azad forması) gələcəkdə genişlənməsini ehtimal sürdü. Tədbirdə qələm əhli, şairin qələm dostları iştirak edərək, kitabla bağlı fikirlərini bölüşdülər. Tanınmış şair Yusif Nəğməkar da gənc şairə öz ürək sözlərini əsirgəmədi.
Qeyd edək ki, kitaba xalq şairi Sabir Rüstəmxanlı ön söz yazıb. Kitabda əsasən müəllifin müasir üslubda yazdığı şeirləri toplanıb. Sevgi, insan, həyat, zaman və digər mövzular kitabda əhatə olunub.
Tədbirin sonunda müəllif öz kitablarını imzalayaraq qonaqlara və media işçilərinə payladı.

150 cildlik Dunya Ədəbiyyatı Kitabxanası seriyasında çapdan çıxan
ilk 6 kitabın təqdimatı oldu

 

Oktyabrın 22-də Bakı Slavyan Universitetində (BSU) Prezidentin sərəncamı ilə nəşr edilən “Dünya
 Ədəbiyyatı Kitabxanası” (DƏK) seriyasından nəşr edilmiş 6 kitabın təqdimat mərasimi keçirilmişdir.
BSU-nun prorektoru professor Asif Hacıyev Kitab klubunun təşkilatçılığı ilə nəşr olunmuş Homerin “İliada” və “Odisseya” poemalarının, Çexovun, Şekspirin, Jül Vernin, Sədi Şirazinin seçilmiş əsərlərinin tərcümə olunaraq dilimizdə nəşr edilməsini böyük hadisə adlandırmışdır.
Kitab Klubunun direktoru Elxan Rzayev Prezident İlham Əliyevin uzaqgörənliklə imzaladığı bu sərəncamın əhəmiyyətindən danışaraq, DƏK-in siyahısına daxil olan 150 kitabdan 45-nin klassik dünya ədəbiyyatına, 40-nın müasir dünya ədəbiyyatına, 40-nın Nobel mükafatına layiq görülmüş müəlliflərin əsərlərinə, 25-nin dünya ədəbiyyatı üzrə antologiyalara aid olduğunu bildirmişdir.
Tədbirdə seriyanın tərcüməçiləri, redaktorları, tərtibatçıları və naşirləri oxucuları maraqlandıran sualları cavablandırmışlar.

---

Balakəndə "Etnoqrafiya Muzeyi"nin açılışı oldu

 

Kitab Klubu böyük məmnuniyyətlə bildirir ki, 12 sentyabr 2009-cu ildə Balakən şəhərində tarixçi Akif Məmmədlinin şəxsi təşəbbüsü və vəsaiti ilə yaradılmış "Etnoqrafiya Muzeyi" açılmışdır.

Etnoqrafiya xalqın keçmişini, milli-mənəvi dəyərlərini göstərən aynadır. Balakən isə bir neçə dövlətin sərhədində yerləşən qədim Azərbaycan şəhəri, çox əski yurd yeridir.
Muzeydə nümayiş etdirilən mikrolitlər, tunc dövrünə aid silahlar, qədim geyimlər, müxtəlif saxsı küplər və məişət əşyaları – sadə mis qablar və toxuculuq məmulatları burada insanların məskunlaşma tarixinin çox qədim olduğunu sübut edir. Qədim tunc əşyalardan tutmuş, geyimə, əşyalar üzərindəki ornamentlərə qədər bütün elementlər Azərbaycanın tarixi və mədəniyyəti ilə bağlıdır.

Kitab klubu Akif Məmmədliyə bu gərəkli işdə müvəffəqiyyətlər arzu edir, qədirbilən xalqımızı Balakən etnoqrafiya muzeyinin açılışı münasibəti ilə təbrik edir və muzeyin daha da inkişaf etdirilib genişləndirilməsi işinə öz yardımlarını əsirgəməməyə çağırır.

Muzeyə yardım etmək istəyənlər öz ianələrini Kitab Klubuna təqdim edə bilərlər.
 

BAKIDA BİRİNCİ BEYNƏLXALQ KİTAB SƏRGİ-YARMARKASI KEÇİRİLDİ

Azərbaycan Mədəniyyət və Turizm Nazirliyi 10-12 sentyabrda 1-ci Bakı Beynəlxalq Kitab Yarmarkası keçirdi.
Sərgi Muzey Mərkəzində "Bakı - İslam Mədəniyyəti Paytaxtı" ili çərçivəsində. İlk dəfə stend və avadanlıqlar nəşriyyat evlərinə pulsuz verilmişdir.
Sərgidə ölkədə fəaliyyət göstərən 60 nəşriyyatın, eləcə də 30 ölkədən nümayəndə heyəti iştirak edirdi . Sərgidə Rusiya, Belarus, Ukrayna, Gürcüstan, Moldova, Türkiyə, İran, Türkmənistan, Qazaxıstan, Özbəkistan, Qırğızıstan, Tacikistan, BƏƏ, Qətər, və s. ölkələr iştirak etdilər.

Kitab Klubunda İsmihan Yusubovun "Matematik güzeldir:

Anlamanın sevinci ve kederi" kitabının təqdimat mərasimi keçirildi.

İyulun 1-də Kitab Klubunda ismihan Yusubovun "Matematik güzeldir: Anlamanın sevinci ve kederi" adlı kitabının teqdimat merasimi keçirildi.

“Dosta Məktub”, “Postskriptum” kitablarından tanıdığımız, ali məktəb tələbələri üçün bir neçə dərs kitabının və bir şeir kitabının müəllifi olan, hazırda Türkiyənin Sakarya universitetində işləyən İsmixan Yusubovun yeni kitabı işıq üzü görmüşdür. Kitab “7 Rəng Basım Yayın ve Filmçilik Ltd. Şti” tərəfindən İstanbulda nəşr olunmuşdur. Kitaba ön sözü Türkiyənin tanınmış filosofu Sait Başer, son sözü isə “Bilim ve Gelecek” jurnalının baş redaktoru Ender Helvacıoğlu yazmışdır. Kitab, müəllifin riyaziyyat, təhsil, elm tarixi, elm fəlsəfəsi və digər yaxın sahələrdə son illərdə qələmə aldığı nisbətən populyar məqalələrindən təşkil olunmuşdur.
Riyaziyyatla bağlı bölümdə sonsuzluqlar aləmində sayma məsələsi, məşhur riyaziyyatçıların uşaqlığı və “uşaq riyaziyyatçılar”, çətin problemlərin asan həlləri, bərabərsizliklərin dəyəri və riyaziyyatdakı önəmi kimi mövzular haqqında bəzi maraqlı mülahizələrə yer verilmişdir. Təhsillə bağlı bölümdə isə əsasən mühəndislərin təlimində riyazi təməl, hədəfin müəyyənləşdirilməsi və tarixə müraciətin önəmi qeyd olunmuş, mücərrəd qavramaları anlamaq üçün model nümunələrinin düzgün seçilməsinin vacibliyi vurğulanmışdır.
Bilim tarixi bölümü türk riyaziyyatçısı Cahit Arf, Hindistanlı dahi Sirinivaza Ramanucan haqqındakı cazibədar hekayələrlə yanaşı, Peterburq və Moskva riyazi məktəblərinin tarixindən parlaq səhifələr və son olaraq da astronomiyada yeni bir dövr açan Keplerin macəralarla dolu həyatı ələ alınmışdır. Bilim fəlsəfəsi bölümü riyazi isbatın fəlsəfi, psixoloji və hətta fizioloji komponentlərinə, riyaziyyatda inanmaq və anlamaq məsələlərinə həsr edilmişdir.
“Təbii hekayələr” adlı son bölümdə Xudu Məmmədovun xatirəsinə həsr olunmuş “Təbiətin keyfiyyət möhrü - simmetriya”, “Molla Nəsrəddindən alınacaq didaktik dərslər” və “Riyaziyyatın roman ve faciə yönləri” kimi yazılar yer almışdır. Birinci məqalədə təbiətdə geniş yayılmış simmetriya hadisəsinin müxtəlif elm sahələrindəki, o cümlədən kristalloqrafiyadakı aparıcı rolundan bəhs edilmişdir. İkinci məqalədə lətifələrin qabığını təşkil edən güldürücü yönü ilə yanaşı, onun nüvəsini təşkil edən düşündürücü yönü önə çıxarılmış və bu lətifələrin məcmusu, “təməlində təbiət və təbiət elmləri, sementi məntiq, siyasət qübbəsində ədalət bayrağı dalğalanan, alınması imkansız olan bir riyaziyyat qalası”na bənzədilmişdir. Son yazıda isə gözəl riyazi nəticələr göz oxşayan rənglərə sahib kəpənəklərlə müqayisə olunarkən, bu nəticələrin ərsəyə gəlməsi üçün çəkilən əzab və işgəncə dolu zəhmət, bu füsunkar kəpənəklərin işıq üzü görməsinə səbəbiyyət verən kiçik qurtcuqların torpağın altında, qaranlıqda, soyuqda və çürüntülər içərisində bəzən illər boyunca pup olmaq üçün verdikləri, əsl qəhrəmanlıq nümunəsi sayılacaq mücadilə ilə müqayisə olunmuşdur.
Ümid etmək istərdik ki, kitab bu mövzularla maraqlanan, onları anlamaq istəyən, anlayacaqlarına inanan və bu yolda bir miqdar zəhmətə qatlanacaq oxucu kütləsi tərəfindən rəğbətlə qarşılanacaqdır.

Kitab Klubunun direktoru Elxan Rzayev, riyaziyyatçı alimlər Qurban Qasımov, Tahir İsmayılov, yazıçı Salatın Əhmədli və başqaları alimin dünyagörüşündəki səlist, məntiqi riyazi analizləri və kitabın qayəsi olan çoxluğun gücü prinsiplərindən danışmış, əsərin müsbət xüsusiyyətlərindən söhbət açmışlar. Kitabın institut tələbələri, yaşlı nəsil, orta məktəb şagirdləri üçün əyani vəsait ola biləcəyi vurğulanmışdır.

Təqdimatın sonunda müəllif kitabları imzalayaraq tədbir iştirakçılarına hədiyyə etmişdir.
 

Kitab Klubunun yeni ofisində «Dünya Ədəbiyyatı Kitabxanası»na
abunə kampaniyasının təqdimetmə mərasimi keçirildi

İyunun 12-də Kitab Klubunda “Dünya Ədəbiyyatı Kitabxanası” (DƏK) layihəsi təqdim olunmuşdur.
Mərasim iştirakçıları əvvəlcə ölkəmizdə çap edilmiş yeni kitablardan ibarət sərgiyə, habelə DƏK çərçivəsində nəşr olunacaq 150 kitabın hər birinin yüksək poliqrafik səviyyədə tərtib olunmuş maketlərinə maraqla baxmışlar.
Klubun direktoru Elxan Rzayev bildirmişdir ki, latın qrafikasına keçidlə əlaqədər Azərbaycan hökuməti iki böyük layihə reallaşdırmağı nəzərdə tutmuşdur. Artıq bunlardan birincisi uğurla başa çatmışdır. İkinci layihə dünya ədəbiyyatından seçmə əsərlərin dilimizə tərcümə olunub nəşr edilməsi ilə bağlıdır. Layihə şərti olaraq “Dünya Ədəbiyyatı Kitabxanası” adlandırılır. Seriyaya daxil olan kitabların siyahısı Azərbaycan Respublikası Prezidentinin 2007-ci il 24 avqust tarixli Sərəncamı ilə təsdiq edilmişdir. DƏK layihəsində 150 kitabın nəşri nəzərdə tutulmuşdur.
Layihənin əlaqələndiricisi Abdulla Əsgərovun rəhbərlik etdiyi “Şərq-Qərb” Açıq Səhmdar Cəmiyyətidir. Kitabların bədii tərtibatı və səhifələnməsi “Tutu” nəşriyyatı tərəfindən aparılır. Yeni kitablar “Şərq-Qərb” və “CBS” mətbəələrində çap ediləcəkdir.
Bildirilmişdir ki, DƏK silsiləsindən kitablara abunə yazılışı klub tərəfindən aparılır.
Əsərlərin tərcüməsi, redaktəsi işi ilə məşğul olacaq yaradıcı heyətin rəhbəri, Bakı Slavyan Universitetinin prorektoru, professor Asif Hacıyev layihənin maarifçilik əhəmiyyətini vurğulamış, qeyd etmişdir ki, nəşr ediləcək kitabların böyük əksəriyyəti Azərbaycan dilində ilk dəfə işıq üzü görəcəkdir. Eyni zamanda, birbaşa orijinaldan tərcümə olunacaq bu əsərlər dünyada baş verən ədəbi və mədəni prosesləri Azərbaycan oxucusuna çatdıracaqdır.
Tədbirdə çıxış edənlərdən Yeni Azərbaycan Partiyası idarə heyətinin üzvü, professor Şahlar Əsgərov, “Tutu” nəşriyyatının direktoru Tərlan Qorçu, Milli Məclisin deputatı Fazil Mustafa, Bakıdakı 190 nömrəli orta məktəbin direktoru Afət Bakıxanova və başqaları yeni layihənin həyata keçirilməsini ölkənin ictimai və mədəni həyatında mühüm hadisə kimi qiymətləndirmiş, 150 kitabdan ibarət Dünya Ədəbiyyatı Kitabxanasına abunənin yüksək səviyyədə aparılacağına inamlarını ifadə etmişlər. Təqdimat iştirakçıları "Dünya Ədəbiyyatı Kitabxanası" seriyasına abunə kompaniyasının gələcək nəslin maarifləndirilməsi işində xüsusi

əhəmiyyətinin olacağını vurğuladılar. Daha ətraflı məlumat almaq üçün buraya tıklayın.

Təqdimat Kitab Klubunun yeni sərgi salonunda
(Murtuza Muxtarov 7, Səadət Sarayının yanı) keçirildi.

Kitab Klubunda yazıçı Varisin “SONUNCU ÖLƏN ÜMİDLƏRDİR”

kitabının təqdimatı keçirildi

Varis
Sonuncu ölən ümidlərdir (roman)

90-cı illərin sonunda “168 saat” qəzetində pero-serial janrında “Sonuncu ölən ümidlərdir” adlı, mövzusu real həyatımızdan götürülmüş bədii əsər dərc olunmağa başladı.
Son dərəcə dramatik hadisələrlə, macəralarla zənginləşdiril-miş bu sevgi əhvalatı qısa vaxt keşiyində bütün ölkədə populyarlıq qazandı.
Kitab “Sonuncu ölən ümidlərdir”in qəhrəmanlarının sonrakı taleyini də özündə əks etdirən roman variantıdır.
Onu bəyənəcəyinizi ümid edirik.

ISBN 978-9952-809-84-8,“Nurlan”, 2008, 352 səh., 15x20, yumşaq, 10000
----------------------------------------------------------------------------------------
Varis Musa oğlu Yolçiyev - Sumqayıt şəhərində anadan olub, Bakı Dövlət Universitetinin filologiya fakültəsini bitirib. Müxtəlif illərdə «168 saat» və «7 gün» qəzetlərinə redaktorluq edib. Azərbaycan Dövlət Televiziyasının populyar «Gecə kanalı» proqramının müəllifi olub. 2003-cü ildə Azərbaycan Prezidentinin İşlər İdarəsinin «Azərbaycan» nəşriyyatının Baş redaktoru təyin edilib. 2007-ci ildə «Azərbaycan Televiziya və Radio Verilişləri» QSC-nin Dövri Nəşrlər və Sosioloji Araşdırmalar Departamentinin Direktoru təyin edilib. 20-dən artıq kitaba redaktorluq edib («Əsl insan haqqında», «Azərbaycan Prezidenti», «Azərbaycan gəncliyi – Azərbaycanın gələcəyi» və s.). İlk bədii ədəbiyyat nümunələri 1990-cı ildə «Ulduz» jurnalında İsmayıl Şıxlının təqdimatı ilə çıxan hekayələridir. Müxtəlif illərdə qəzet və jurnallarda onlarla bədii əsəri dərc edilib. Pero-serial janrında yazılmış «Sonuncu ölən ümidlərdir», «Səhər heç vaxt açılmayacaq», «Sənə inanıram», «Tənha yalquzağın nağılı», «Yol ayrıcında azıb qalanlar» kimi yazıları böyük populyarlıq qazanıb. İlk kitabı 2008-ci ilin noyabrında dərc edilib – «Sonuncu ölən ümidlərdir». 10 000 tirajlıq bu kitabla müəllif 1000 nüsxəlik satış həcminə cəmi 47 gündə nail olub, qısa müddətdə 500-ə yaxın oxucu məktubu alıb.

Tədbirin sonunda yazıçı təqdim etdiyi kitabı pulsuz paylayıb.

XALQ YAZIÇISI SABİR ƏHMƏDLİNİN “UYUQ” (HEKAYƏLƏR) KİTABININ
TƏQDİMATI KEÇİRİLDİ

20.02.2009 saat 12:00-da Kitab Klubunun sərgi salonunda xalq yazıçısı Sabir Əhmədlinin “Uyuq” (Hekayələr) adlı kitabının təqdimat mərasimi keçirildi.
Kitaba xalq yazıçısı Sabir Əhmədli son hekayələri daxil edilmişdir. Bu hekayələr insanı mənən zənginləşdirən, ruhən kamilləşdirən əsərlərdir. Həqiqi bədii yaradıcılıq məhsulu olan bu əsərlərin əsl qayəsi budur: - Haqqa, insanlığa ayrı gözlə baxmaq günahdır. Kitab 300 tirajla nəşr olunub. Kitabın ön sözünü yazıçı Mübariz Məsimoğlu yazmışdır.
Tədbirdə yazıçının dostları – tanınmış Azərbaycan şair və yazıçıları, ictimai-siyasi xadimlər, jurnalist əhli iştirak edirdilər.
Tədbirdə millət vəkili, şair Aqil Abbas, xalq yazıçısı Sabir Rüstəmxanlı, yazıçı Mübariz Məsimoğlu, əməkdar jurnalist Fazil Güney (Abbasov), millət vəkili, tarixçi Cəmil Həsənli, “Xalq” qəzetinin baş redaktoru Tahir Aydınoğlu, hüquqşünas alim Adil Minbaşı, Sirus Təbrizli, Mehriban Vəzir, Həmid Herisçi və s. iştirakçılar xalq yazıçısı Sabir Əhmədlinin yeni kitabı, özü və fəaliyyəti haqqında öz ürək sözlərini əsirgəmədilər.

Sabir Əhmədli
Uyuq (Hekayələr)
“Nasir”, 2008, 64 səh., 14x20, yumşaq, 300
 

Əhmədli Sabir Məmməd oğlu — nasir, publisist, 1930-cu ildə Cəbrayıl rayonunun Cəbrayıl kəndində anadan olmuşdur. İlk təhsilini kənd məktəbində almış, daha sonra Azərbaycan Dövlət Universitetinə daxil olub l951-ci ildə fərqlənmə diplomu ilə bitirmişdir. Universiteti qurtardıqdan sonra Cəbrayıl rayonuna qayıtmış, müəllimlik etmişdir. Ədəbi yaradıcılığa hələ tələbə ikən başlamış, ilk hekayələri çap olunmuşdur. Hekayə yaradıcılığındakı uğurlar onu ədəbi yaradıcılığa daha yaxından bağlamış, daha iri həcmdə əsərlər yaratmışdır. Sabir Əhmədlinin 50 ildən artıq bir müddətdə ədəbi yaradıcılığı bir sıra əsərlərlə oxucularda və ədəbi ictimaiyyətdə maraq oyatmışdır. O, 20-yə qədər romanın müəllifidir. Yazıçını başlıca olaraq kənd həyatı, kənd ziyalıları, onların mənəvi həyatı, ruh aləmi daha artıq cəlb etmiş, bu istiqamətdə işləmişdir. Son romanları Azərbaycanın taleyində baş vermiş ciddi hadisələrlə yaxından bağlıdır. Onlar Qarabağ münaqişəsinə dair və son illər Azərbaycanda baş vermiş ictimai-siyasi hadisələrə dair ciddi həyati materiala əsaslanır. Sabir Əhmədlinin hekayə və romanları xarici ölkələrdə dərc edilmiş, maraqlı rəylər doğurmuşdur. Moskvada "Sovetskiy pisatel" nəşriyyatında onun üç böyük kitabın "Yamacda nişanə", "Yaşıl teatr", "Yasamal gölündə qayıqlar üzürdü" çap edilmişdir. 1955-ci ildən AYB-nın üzvü, Azərbaycanın xalq yazıçısı (1992), Əməkdar incəsənət xadimi (1984), «Qızıl sünbül» ədəbi mükafatı laureatı (1991). «Ədəbiyyat və incəsənət» qəzeti redaksiyasında ədəbi işçi, nəsr şöbəsinin müdiri (1956-1993), baş redaktor (1993-1996) işləmişdir. «Əmək şöhrətinə görə» medalı ilə təltif edilmişdir (1975).
«Toğana» (1981), «Yasamal gölündə qayıqlar» (1984), «Gedənlərin qayıtmağı, dünyanın arşını» (1985), «Kütlə» (1999), «Axirət sevdası» (2003), «Şəhid ruhu» (2004) və s. kitabların müəllifidir. II Dünya Müharibəsi qəhrəmanı Cəmil Əhmədovun qardaşıdır.

Tədbirin sonunda yazar təqdim etdiyi kitabını oxucular üçün imzalayıb.

Çingiz Abdullayevin “Quba Kapriççiosu” kitabının təqdimat mərasimi keçirilib

Fevralın 12-si Bakı Kitab Klubunun Sərgi Salonunda Azərbaycan Yazıçılar Birliyinin katibi, dünya şöhrətli yazıçımız Çingiz Abdullayevin Azərbaycan dilinə tərcümə edilmiş “Quba Kapriççiosu” kitabının təqdimat mərasimi keçirildi. Ç. Abdullayevin “Quba Kapriççiosu” adlı kitabı 21 fəsildən ibarətdir. Əsər ən məhşur almazlardan birinin müasir günlərimizdəki macəralarından bəhs edir. Bu sayaq məşhuri-cahan ləl-cavahiratın hər biri arxasınca uzun, qanlı iz qoyub gəlmiş və mənsub olduğu şəxslərə daim müşküllər yaratmışdır. Tanınmış ekspert-kriminalist Dronqo Quba yəhudisi, zərgər Semyon İzmaylova məxsus olub itmiş “Şah Abbas” almazının axtarışlarına çıxarkən qətl hadisələrini də açmaq məcburiyyətində qalır... Kitabın rus dilindən Azərbaycan dilinə tərcüməçisi Munisə Dadaşqızı, redaktoru isə Təbəssüm Muxtarovadır.

Tədbiri Klubun direktoru E.Rzayev açdı, dedektiv janrı barəsində öz ürək sözlərini bildirib, kitabın tərcüməçisi Munisə Dadaşqızına verdi. Tərcüməçi öz növbəsində Ç.Abdullayevin yeni əsəri olan “Quba Kapriççiosu” ona ruhən yaxın olmasını və bu kimi əsərləri tərcümə etməkdən böyük zövq almasını qeyd etdi.

Sözügedən tədbirdə yazıçı Çingiz Abdullayev ”Mən heç vaxt öz kitablarımın təqdimat mərasimini keçirmirəm. Çünki mənim hər ay böyük tirajla kitablarım çıxır. Əgər mən onların hər birinin təqdimat mərasimini keçirsəm, onda mənim yeni əsərlər yazmaq üçün heç vaxtım qalmaz” söylədi, çoxsaylı sualları cavablandırdı. Sonda, yazıçı kitabın Azərbaycan dilində ərsəyə gəlməsində çəkdiyi əməyə görə tərcüməçi Munisə Dadaşqızına və redaktoru Təbəssüm Muxtarovaya öz təşəkkürünü bildirdi.

Tədbirin sonunda yazar təqdim etdiyi kitabı oxucular üçün imzalayıb.

Mətbuat konfransı: M.Ə.Rəsulzadə - 125

2009-cu il yanvarın 22-də saat 12.00-da Kitab Klubunda Azərbaycan Xalq Cümhuriyyətinin banisi Məhəmməd Əmin Rəsulzadənin anadan olmasının 125 illiyi ilə əlaqədar mətbuat konfransı və M.Ə.Rəsulzadəyə həsr olunmuş «Gecikmiş etiraf kimi…» adlı kitabın təqdimatı keçirildi.
Mətbuat konfransında M.Ə.Rəsulzadənin nəvəsi əməkdar rəssam, Azərbaycan Pedaqoji Universitetinin dosenti Rais Rəsulzadə, və “Gecikmiş etiraf kimi…” kitabının müəllifi Nəcibə Bağırzadədən başqa görkəmli şəxsiyyətlər iştirak edirdilər. Qonaqlara yubileylə bağlı çap olunmuş təqvimlər və təqdimatı olan kitablar paylandı.

Tədbir M.Ə.Rəsulzadənin ömür yolundan, şəcərəsindən bəhs olunmaqla yanaşı, ona həsr edilmiş “Gecikmiş etiraf kimi” kitabının tədimatı ilə başlandı.  Kitab Azərbaycan Demokratik Respublikasının ilk qurucusu, dahi Məhəmməd Əmin Rəsulzadə və onun doğmalarının ömür yolunu, talehini əks etdirir. Tədbiri Klubun əməkdaşı Fazil Kərimov açıq elan etdi. Kitabın müəllifi Nəcibə Kamal qızı Bağırzadə Bakıda doğulub. 1992-ci ildə M.Ə.Rəsulzadə adına Bakı Dövlət Universitetinin jurnalistika fakültəsini bitirib. “Göndərmədiyim məktublar” adlı şeir kitabının müəllifidir. O, nəşrin yaranması zərurətindən və M.Ə.Rəsulzadənin həyatından bəhs etdi: “Tarixi yazmaq onu yaratmaq qədər çətin bir işdir. Mənə elə gəlir ki, Məhəmməd Əmin Rəsulzadə Azərbaycan tarixini həm yaza, həm də yarada bildi. Məhz onun xidmətləri nəticəsində Şərqdə ilk dəfə demokratik respublika quruldu. 71 il sürdüyü ömrü boyunca bu insanın elə bir günü olmayıb ki, Azərbaycan sevgisilə yaşamasın, Azərbaycanın mücadiləsi uğrunda çalışmasın. Çox təəssüf ki, onun məzarı Azərbaycanda deyil və biz onu layiqincə dəyərləndirə bilməmişik. Onun özü də, ailəsi də çox böyük məhrumiyyətlər görüb. Nəvəsi Firuzə xanım hazırda Lökbatanda yaşayır. Firuzə xanım anası Lətifə, bacısı İşvə ilə Qazaxıstandakı sürgünlük həyatından danışarkən dedi ki, anası ilə bacısı aclıqdan və soyuqdan donub ölüb, onları basdıran belə olmayıb, bacısı Sona itkin düşüb. Firuzə xanım deyir ki, sahibsiz qalıb, ona uşaq evində tullantı sümükləri veriblər. Biz tarixdən dərs almadığımız üçün tarix yenidən təkrarlanır. Məhəmməd Əmin Rəsulzadəni Azərbaycanda xatirələrdə yaşatmağa ehtiyac var, bu bizim borcumuzdur, onun isə qazandığı haqdır”.
Tədbirdə çıxış edən M.Ə.Rəsulzadə irsinin araşdırıcısı, tədqiqatçı alim Nəsman Yaqublu M.Ə.Rəsulzadənin Azərbaycanın müstəqilliyinin qazanılmasında göstərdiyi xidmətlərindən, milli-ideologiyanın formalaşasındakı əməyindən danışdı: “Bu gün Məhəmməd Əmin Rəsulzadənin 125 illik yubileyi daha geniş şəkildə və geniş məkanda qeyd olunmalıydı. Rəsulzadəni Mirzəbala Məmmədzadə bir cümlə ilə belə xarakterizə edib: “Rəsulzadə Azərbaycan milli-qurtuluş hərəkatının ideoloqudur”. İdeoloq məqamına yüksəlmək hər insana nəsib olmur. O, hələ gənc yaşlarından xalqının maariflənməsində, dünyagörüşünün formalaşmasında böyük xidmətlər göstərib. Mən onun yaradıcılığını araşdırarkən məlum oldu ki, onun 40-50 cildlik əsərləri mövcuddur. Təkcə Polşadan onun yazdıqları ilə bağlı 20 kq-dan çox arxiv materialı gətirmişəm. Hələ İngiltərədə, Türkiyədə də onun əlyazmaları saxlanır. 70 il ərzində sovet hökuməti nə qədər çalışsa da, onu bizim qəlbimizdən silə bilmədi. O, bizim yaddaşlarımızda daim yaşayacaq".

Tanınmış yazıçı, publisist Teyyub Qurban da öz ürək sözlərini gələn qonaqlara bildirdi. Sonda "Dirilik gəmisi" kitabından M.Ə.Rəsulzadəyə həsr etdiyi şeirlərini oxudu.

Mətbuat konfransında iştirak edənlərdən Hacıəmi Atakişiyev və başqaları da çıxış etdilər.
M.Ə.Rəsulzadənin nəvəsi, əməkdar rəssam Rəis Rəsulzadə tədbir iştirakçılarına minnətdarlıq etdi: “Onun nəvəsi Gözəl xanım da bu tədbirdə iştirak etmək istəyirdi, lakin təəssüf ki, onun səhhəti hazırda pis vəziyyətdədir, iflic olduğu üçün gələ bilmədi”.
Qeyd edək ki, “Gecikmiş etiraf kimi” kitabının üz qabığındakı M.Ə.Rəsulzadənin rəsmi xalq rəssamı, Rəsulzadə irsindən olan Oqtay Sadıqzadəyə məxsusdur. Kitabın rəssamı Rəis Rəsulzadə, redaktoru isə Anar İsabəylidir.

Nəcibə Bağırzadə
Gecikmiş etiraf kimi...
Kitab Azərbaycan Demokratik Respublikasının ilk qurucusu, dahi Məhəmməd Əmin Rəsulzadə və onun doğmalarının ömür yolunu, həyat hekayəsini anlatmaq istəyinin ifadəsidir.
“Şirvannəşr”, 2007, 128 səh., 14x20, yumşaq
----------------------------------------------------------------------