Təqdimatlar

KİTAB KLUBUNDA 2004-cü il dekabrın 3-də
Əliağa Cəfərlinin“Bəlalı dağlar” romanının təqdimatı

2004-cü il dekabrın 3-də Kitab Klubunda Əliağa Cəfərlinin“Bəlalı dağlar” romanının təqdimatı keçirildi. Klubun direktoru Elxan Rzayev giriş sözündə Əliağa müəllimi qonaqlara təqdim etdi. Əliağa Cəfərlinin yaradıcılığı haqqında “Nurlan” nəşriyyatının direktoru professor Nadir Məmmədli məruzə ilə çıxış etdi. Hacı Əliağa Qafar oğlu Cəfərli 1954-cü ildə Bakı şəhərində anadan olub. 1983-cü ildə Azərbaycan Dövlət Universitetini bitirib. 1987-ci ildə Moskva Dövlət Mətbuat Akademiyasına daxil olub, müvəffəqiyyətlə namizədlik dissertasiyasını müdafiə edib. Tarix elmləri namizədidir. 1970-ci ildən başlayaraq 100-dən artıq elmi, elmi-kütləvi məqaləsi dövri mətbuatda dərc edilib. “Xocalı faciəsi”, “Bəlalı dağlar” romanlarının, “Сасанидская держава в 3-5 вв” əsərinin müəllifidir. Üç cildlik “Azərbaycan dilinin izahlı lüğəti”nin tərtibçilərindən biridir, beş cildlik “Azərbaycan nağılları”nı yenidən işləyib nəşr etdirmişdir. Azərbaycan Yazıçılar və Jurnalistlər Birliklərinin üzvüdür, “Qızıl qələm” mükafatının laureatıdır. V. S. Altunin ad. Rusiya “Ekologiya və Təbii sərvətlərdən istifadə” Akademiyasının həqiqi üzvüdür. Əliağa Cəfərli respublikamızda ən böyük kitab mağazası olan məşhur “Akademkitab” mağazasının direktorudur. “Bəlalı dağlar” romanında bir ailənin son 150 illik tarixi qələmə alınıb. Əsərdə sadə azərbaycanlı ailəsinin həyat tərzindən, məşğuliyyətindən, ailə, nəsil münasibətlərindən, qayğılarından danışılır. Eləcə də 1905-1920 -ci illərdə mənfur ermənilərin azərbaycanlılara qarşı törətdikləri fitnəkarlıqlardan və onlara göstərilən müqavimətdən bəhs edilir. Əsər xalqımızın etnoqrafiyası, tarixi, məişəti, həyat tərzi ilə maraqlanan geniş oxucu auditoriyasına ünvanlanıb.

Pərviz Rzaquliyev Əliağa müəllimi həm görkəmli alim, istedadlı yazıçı, jurnalist, bacarıqlı naşir və menecer, həm də təvazökar, təmkinli insan kimi səciyyələndirdi. Rafiq Məmmədli Ə. Cəfərlinin “Akademkitab” mağazasının direktoru kimi fəaliyyətini yüksək qiymətləndirdi. Tanınmış alim və tənqidçi İlham Rəhimli verdiyi müsahibədə Ə. Cəfərlinin “Bəlalı dağlar” romanı haqqında belə dedi: -Viktor Hüqo vaxtı ilə qeyd etmişdi ki, növbəti əsrdə yazıçılar oxucuları daha çox özlərinin iştirakçısı olduqları hadisələri təsvir etməklə heyrətləndirəcəklər. Ə. Cəfərlinin “Bəlalı dağlar” romanı məhz bu baxımdan diqqəti cəlb edir. Əsərin əsas oxunaqlı cəhəti ondadır ki müəllif bizə məlum olan hadisələri dramatik-psixoloji gərginliklə, emosional bədii təsvirlərlə verə bilib. Yazıçı əsərində Azərbaycan dilinin zəngin xüsusiyyətlərindən məharətlə istifadə edib. Bu da romanın ümumi ideyasını və ayrı-ayrı personajların xasiyyətini düzgün qavramaqda oxuculara yaxından kömək edir. Mənə elə gəlir ki, “Bəlalı dağlar” romanı azərbaycanlı-erməni münaqişəsinə aid dəyərli tarixi-bədii əsərdir. çıxış etdilər bir yazıçı kimi bədii təxəyyülünün zənginliyi, kəskin və dramatik süjet qurmaq bacarığı göstərir ki, ədib gələcəkdə də öz oxucularını yeni-yeni bədii əsərləri ilə sevindirəcək.

“Akademkitab” mağazasının əməkdaşı Aqil Səfərovun dediklərindən: - “Roman tarixi əhəmiyyət kəsb edən hadisələrdən bəhs edir. Erməni - müsəlman savaşının, Sovetin qanlı repressiyalarının dövrü, stalinizmin eybəcərliklərinin təsviri insan qəlbinin kövrək tellərini qıcıqlandırır. “Bəlalı dağları” oxumağa başlayanda elə bilirdim oxunuşu ağır olacaq, amma yanılmışdım – bir nəfəsə oxudum. Səbirsizliklə 2-ci hissəsinin çapdan çıxmasını gözləyirəm.”

“Akademkitab” mağazasının əməkdaşı Sevil Quliyeva Əliağa müəllimdən söhbət açdı: “- Əliağa müəllim olduqca gözəl insandır, bacarıqlı rəhbərdir, daim işçilərinin qayğısına qalandır. Heç vaxt köməyini bir adamdan əsirgəməz, yaxşı və pis gündə işçinin yanında olur. “Bəlalı dağları” oxumuşam. Romanda keçmiş sanki gələcəyə qovuşur, Azərbaycan təbiətinin əsrarəngiz mənzərələrinin, insan xasiyyətlərinin təsviri özünəməxsusluğu ilə adamı heyran qoyur.”

Tədbirdə “Maarif” nəşriyyatının direktor müavini Xəlil Talıbov, C. Cabbarlı ad. kitabxananın direktoru Tahir Sadıqov, “Xalq” qəzetinin redaktor müavini Tahir Aydın oğlu və b. çıxış etdilər. Sonda çıxış edən Ə. Cəfərli gələcək planları ilə bölüşdü.

26 noyabr 2004-cü il tarixdə Kitab Klubunun 2004-2(4) saylı “Azərbaycan nəşrləri” kataloqu və İnternet səhifənin təqdimatı

Təqdimat mərasimini giriş sözü ilə Kitab Klubunun direktoru Elxan Rzayev açdı:

 “Azərbaycan nəşrləri” kataloqunun 2004-2(4) sayının 36 səhifəsində son aylarda respublikada işıq üzü görmüş kitablar haqqında məlumat verilib.

36-cı səhifədə verilmiş ad göstəricisində kitabların adı 3 sütunda əlifba sırası ilə düzülüb. 3-cü sütunun 2-ci hissəsində rus dilində çap olunmuş kitablar həmçinin əlifba sırası ilə yer alıb. 35-ci səhifədə Kitab Klubunun “Azərbaycan nəşrləri” kataloqu haqqında məlumat, Kitab Klubunun kitabsevərlərə müraciəti, yeni nəşrlərini “Azərbaycan nəşrləri” kataloqunun növbəti saylarında görmək arzusunda olan naşir və müəlliflər üçün kitabların yerləşdirilmə qaydaları dərc edilib.

Kataloqun bu sayındakı yeniliklər sırasında yeni rubrikanın - “İncəsənət ” bölməsinin açılmasını və Kitab Klubunun İnternet səhifəsi haqqında məlumatı göstərmək olar.

Üz qapağının 2-ci səhifəsində “Nurlan” nəşriyyat-poliqrafiya müəssisəsinin təsisçisi və direktoru, filologiya elmləri doktoru Nadir Məmmədlinin 45 yaşı tamam olması münasibəti ilə məlumat verilib. Kataloqda Kitab Klubunun 3 yeni nəşri haqqında anonslar dərc olunub:

- 16-cı səhifədə Üzeyir bəy Hacıbəyovun Seyran Ağabəyov tərəfindən ingilis dilinə tərcümə olunmuş “O olmasın, bu olsun!” musiqili komediyasının anonsu; - 20-ci səhifədə ingilis dilindən Azərbaycan dilinə tərcümə olunmuş “Beynəlxalq əlaqələr” sorğu kitabının anonsu; - 33-cü səhifədə Pərviz Rzaquliyevin “Sinədən gəlir bu zəhrimar” adlı illüstrasiyalı satirik şer və təmsillər kitabının anonsu yerləşdirilib.

Qonaqları müəyyən statistik məlumatlarla da tanış edə bilərik. “Azərbaycan nəşrləri” kataloqunun təqdim edilən sayına 54 nəşriyyatda işıq üzü görmüş 325 kitab daxil edilib. Onlardan 36-sı rus dilindədir. Yeni kitabların sayına görə “Nurlan” nəşriyyatı şəksiz liderdir. 2-ci yerə ”Adiloğlu”, 3-cü yerə isə “Elm” nəşriyyatı çıxıb. “Qanun” və “Şirvannəşr” 4-cü və 5-ci yerləri bölüşdürüblər. Müəlliflərdən 12 nağıl kitabı “Uşaq ədəbiyyatı” bölməsində təqdim olunan Gülzar xanım İbrahimovanı, 3 bölmədə 11 kitabı yer alan Nazim bəy Məmmədbəyovu qeyd etmək istərdik.

Kataloqun bölmələrini nəzərdən keçirək. “Elmi və elmi-kütləvi” bölməyə - 65, “Dərsliklər və dərs vəsaitləri” bölməsinə -27,  “Lüğətlər və ensiklopediyalar” bölməsinə - 17, “Bədii ədəbiyyata” – 106, “Publisistikaya” – 63, “Hüquq, iqtisadiyyat, menecmentə” - 18, “Uşaq ədəbiyyatına” – 20, yeni açılmış “İncəsənət” bölməsinə isə 8 kitab və 1 albom haqqında məlumatlar daxil edilib.

Kitab klubunun www.kitabklubu.org ünvanında yerləşəcək İnternet səhifəsinin məqsədi Azərbaycanda kitab işinin vəziyyəti ilə əlaqədar məlumatları şəbəkə vasitəsilə beynəlxalq aləmə çıxarmaqdır. Ümumilikdə internet səhifəsi doqquz bölmədən ibarətdir:

• Yeniliklər

• Azərbaycan nəşrləri kataloqu

• Nəşriyyatlar

• Mətbəələr

• Bizim haqqımızdı

• Ana səhifə

• Kontakt

• Anket

• Faydalı mənbələr

Bu bölmələrdə Azərbaycanın kitab aləmində baş verən yeni hadisələr barəsində məlumat almaq, yeni kitablar və onlarla əlaqədar tədbirlərlə tanış olmaq, kitab bazarının vəziyyəti ilə əlaqədar sorğularda birbaşa və dolayısıyla iştirak etmək. Azərbaycan nəşrləri kitab-kataloqunun elektron variantı ilə tanış olmaq mümkündür. İnternet səhifəsində, eləcə də çapa hazırlanan yeni kitablar haqqında elanları da tapmaq olar.

Bu səhifə aləmə bir pəncərə kimi düşünülmüşdür. Gələcəkdə təkcə kitablar deyil müəlliflər haqqında məlumatların da səhifədə yerləşdirilməsi nəzərdə tutulur.

Səhifədən səmərəli istifadə qaydasını onun devizindən oxumaq olar: «Kitabını dünyaya tanıtmaq istəyirsənsə bir nüsxəsini Kluba gətir».

Məlum olduğu kimi İnternet səhifələri üzərində iş daim davam edir və onları sonsuzluğa qədər təkmilləşdirmək mümkündür. Sizə təqdim edilən bu səhifənin də müəyyən bölmələri hələ tam işlənməyib. Biz bu bölmələrlə və ümumiyyətlə internet səhifəsi ilə əlaqədar rəy və təkliflərini bizə göndərəcək şəxslərə minnətdar olardıq.

Tədbirdə dramaturq Nazim Məmmədbəyov, Multimedia mərkəzinin direktoru Osman Gündüz, “Ulduz” jurnalının şöbə rəhbəri İlqar Fəhmi çıxış etdilər.

18 noyabr təqdimatı

2004-cü ilin noyabr ayının 18-də Kitab Klubunun sərgi salonunda şair, bəstəkar, rəssam, pedaqoq- Azərbaycan Respublikası Təhsil nazirliyi Estetik tərbiyə üzrə respublika tədris-metodik mərkəzinin direktoru Nazim Məmmədbəyovun kitablarının təqdimat mərasimi keçirildi. Tədbiri giriş sözü ilə Kitab Klubunun direktoru Elxan Rzayev açdı. Müəllifi qonaqlara və media nümayəndələrinə Pərviz Rzaquliyev təqdim etdi:

-Hörmətli qonaqlar!

Böyük məmnuniyyət hissi ilə sizə yaradıcı şəxsiyyətlərdən olan Nazim Məmmədbəyovu təqdim edirəm. Nazim Həsən oğlu Məmmədbəyov kimdir? Əvvəla, Azərbaycanı iki beynəlxalq təşkilatda təmsil edən şəxsdir. “Əlil uşaqlara incəsənət vasitəsi ilə yardım” Beynəlxalq Assosiasiyasının prezidentidir- mərkəzi qərargahı Fransanın Bordo şəhərində yerləşir, “Uşaq və gənclərin yaradıcılığı” Beynəlxalq Assosiasiyasının vitse-prezidentidir. Azərbaycan Memarlar ittifaqının üzvüdür. Uşaqların estetik tərbiyəsi üzrə görkəmli mütəxəssisdir, o cümlədən əlil – beyin iflicinə mübtəla, zehni cəhətdən zəif, lal-kar, kor və zəif görən uşaqların musiqi və təsviri sənət vasitələrilə estetik tərbiyəsinin metodikası üzrə respublikada barmaqla sayıla bilən bir neçə mütəxəssisdən biridir. Onun yetirmələrindən təkcə bir neçəsinin - Rəssamlar ittifaqının üzvü Mir Cəfər Bağırovun, Zaur Seyidzadənin adlarını çəkmək kifayətdir.

Nazim müəllimdən uzun-uzadı danışmaq olar. Bu insan 70 illik yubileyinin yaxınlaşmasına baxmayaraq dincəlmək bilmir, daim yaradıcı axtarışdadır, yazıb-yaratmaqla məşğuldur. Qeyd etmək istəyirəm ki, Kitab Klubunun “Azərbaycan nəşrləri” kataloqunun yeni, 4-cü sayının üç bölməsinə Nazim müəllimin “Səda” nəşriyyatında nəşr edilmiş 11 kitabı haqda məlumat daxil edilib. Bu gın Kitab Klubu Nazim Məmmədbəyovun “Yüngül qazanc” komediyasını və 2004-cü ildə işıq üzü görmüş digər kitablarını ictimaiyyətə təqdim edir.

Kitab Klubunda təqdimat

Bir neçə ay bundan əvvəl fəaliyyətə başlamış Kitab Klubu öz növbəti tədbirini keçirdi. Cari ilin oktyabr ayının 13-də Kitab Klubunun sərgi salonunda “Pedaqogika” nəşriyyatının buraxdığı “HƏYAT BİLGİSİ” və 1-ci sinif üçün “RİYAZİYYAT” (A, B, C, D) dərsliklərinin təqdimatı təşkil edildi.

Tədbirdə Azərbaycan Respublikası Təhsil nazirliyinin Təhsil Problemləri institutunun direktoru akademik Abdulla Mehrabov, institutun şöbə müdiri elmlər doktoru, professor Yəhya Kərimov, elmlər doktoru, professor Vidadi Xəlilov, Səbayel rayon təhsil şöbəsinin müdiri Sara Xanlarova, uşaq nağılları müəllifi Gülzar İbrahimova, Azərbaycan Respublikası Təhsil nazirliyinin Estetik tərbiyə üzrə respublika tədris-metodik mərkəzinin əməkdaşı İradə Məmmədova, Bakı şəhəri 150 saylı ümumtəhsil orta məktəbinin direktor müavini Mahirə xanım, həmin məktəbin ibtidai sinif müəllimləri Svetlana Müseyibova, Elmira Hacıyeva, Xətai rayonu 55 saylı orta məktəbin ibtidai sinif müəllimi Xuraman Quliyeva, media nümayəndələri və başqa qonaqlar iştirak edirdi.

Təqdimat mərasimini giriş sözü ilə Kitab Klubunun direktoru Elxan Rzayev açdı. O, HƏYAT BİLGİSİ” və 1-ci sinif üçün “RİYAZİYYAT” (A, B, C, D) dərsliklərinin ənənəvi dərsliklərdən hansı xüsusiyyətləri ilə fərqləndiyini müxtəsər izah etdi, Zahid Qaralov, Əlövsət Osmanlı, Fikrət Süleymanoğlu və Vüqar Məmmədovdan ibarət yaradıcı kollektiv haqqında məlumat verdi, müəlliflərin dərslik yaradıcılığı prosesində forma və məzmun seçiminin üstünlüklərini açıqladı. Çıxışının sonunda Elxan bəy qeyd etdi ki, Kitab Klubun 2005-ci ildə “İlin ən yaxşı dərsliyi” devizi altında Respublika müsabiqəsini təşkil etməyi planlaşdırır. Müsabiqə-baxışın münsiflər heyətinə Azərbaycanın ən hörmətli ekspert və mütəxəssisləri dəvət olunacaq. Belə müsabiqə bu il keçirilsəydi, “HƏYAT BİLGİSİ” və 1-ci sinif üçün “RİYAZİYYAT” (A, B, C, D) dərslikləri, şübhəsiz, laureatlar sırasında olacaqdı. Sonra söz Əlövsət Osmanlıya verildi. Əlövsət müəllim müəllif kollektivinin klassik dərslik formasından imtina edərək inkişaf etmiş ölkələrdə tətbiq olunan statik ekran prinsipinə əsaslanan universal dərslik yaratmağa üstünlük verməsi səbəblərini açıqladı. Bu kitablarda dərslik, iş dəftəri, test kitabçası və yoxlama işləri bir vəsaitdə cəmləşdiyindən daim şagirdin əli altındadır. Yeni forma və məzmun 6 yaşlıları mexaniki surətdə yalnız ev tapşırıqlarını yerinə yetirməyə deyil, daim fəal axtarışda olmağa istiqamətləndirir, onlarda yaradıcılıq həvəsi və vərdişləri oyadır, suallarına həyatın özündə cavab tapmağa kömək edir. Əlövsət müəllim dərsliklərin həm Azərbaycan, həm də rusdilli məktəblər üçün buraxıldığını xüsusi vurğuladı, “Познание мира” və “Математикa” -1(A, B, C, D) dərsliklərinin rus məktəblərinin ibtidai sinif müəllimləri və 6 yaşlıların valideynlərinin böyük marağına səbəb olduğunu qeyd etdi. Çıxışının sonunda Əlövsət Osmanlı “Pedaqogika” nəşriyyatının 2-ci, 3-cü, 4-cü siniflər üçün belə dərsliklər hazırlamaq planlarından danışdı, Kitab Klubuna isə belə gözəl tədbir təşkil etdiyinə görə dərin minnətdarlığını bildirdi.

Müzakirələrdə akademik Abdulla Mehrabov, professorlar Yəhya Kərimov və Vidadi Xəlilov, Səbayel təhsil şöbəsinin müdiri Sara xanım, ibtidai sinif müəllimləri Svetlana Müseyibova, Elmira Hacıyeva, Xuraman Quliyeva və başqaları çıxış etdi. Akademik Mehrabov təqdim olunan dərsliklərin üstünlüklərindən və cüzi nöqsanlarından danışdı, növbəti dərs ili üçün dərsliklər silsiləsinin daha uğurlu olacağına inandığını bildirdi, yaradıcı kollektivə müvəffəqiyyət arzuladı.

Səbayel rayon təhsil şöbəsinin müdiri Sara xanım təqdim olunan dərsliklərin yüksək keyfiyyətli olduğundan söhbət açdı. O, bugünkü tədbiri yüksək səviyyədə təşkil etdiyinə görə Kitab Klubunun rəhbərliyinə təşəkkürünü bildirdi, qeyd etdi ki, “Kitab Klubu” təşkil etmək fikri olduqca uğurlu ideyadır və Klubun fəaliyyəti artıq öz bəhrəsini verir.

Xətai rayonu 55 saylı ümumtəhsil orta məktəbinin ibtidai sinif müəllimi Xuraman Quliyevanın çıxışı təqdimat iştirakçıları arasında xüsusi canlanma yaratdı. O, dərsliklərin baha olduğunu bildirdi. “HƏYAT BİLGİSİ” dərsliyinin əla dizaynına, şagirdlərin diqqətini özünə cəlb edən rəngarəng, səlis boyalı rəsmlərini yüksək qiymətləndirdi, arzu etdi ki, sözügedən dərsliklər pulsuz dərsliklər siyahısına daxil edilsin.

Təqdimat mərasiminin yaraşığına çevrilmiş diskussiya başa çatdı. Tədbirə yekun vuran Elxan bəy Rzayev pedaqoq-alimlərə, müəllif kollektivinə, media nümayəndələrinə və digər qonaqlara Kitab Klubunun tədbirində iştirak etdiklərinə görə təşəkkürünü bildirdi.